ოპერაციის დადებითი მხარეები

მიუხედავად იმისა, რომ კოსმეტიკური შედეგები ოპერაციის შემდგომ უფრო მარტივად აღსაქმელია, სარგებლიანობა რაც ამ პროცედურების შემდგომ ჯანმრთელობის კუთხით მიიღწევა, ბევრად უფრო მნიშვნელოვანია. მაშინ  როცა სახეზეა სიმსუქნის თანმხლები დაავადებები, საჭიროა ვიცოდეთ, როგორ ეხმარება ბარიატრიული ქირურგია მათ აღმოფხვრას.

სლივ გასტრექტომია კუჭის ბაიფასთან შედარებით მეტად მარტივი პროცედურაა ტექნიკურად და რეაბილიტაციის დროც ბევრად ნაკლებია. ამ დროს არ ხდება კუჭ-ნაწლავის ტრაქტზე ზემოქმედება, რაც ამცირებს გამწვავებების რისკს, მათ შორის ადგილი არ აქვს არც ვიტამინების დეფიციტის წარმოქმნას, რაც ხშირად ხდება კუჭის ბაიფასის დროს. შესაბამისად, პაციენტები იღებენ იდენტურად ეფექტურ შედეგებს, ნაკლებ დროში და ნაკლები სირთულით. ერთ-ერთი მიზეზი, თუ რატომ არის სლივ გასტრექტომიის შედეგები ასეთი პოზიტიური, არის ის, რომ ამ დროს ხდება კუჭის ნაწილის ამოღება, რომელიც გამოიმუშავებს გრელინის ჰორმონებს. ეს ჰორმონი ცნობილია, როგორც შიმშილის გამომწვევი ჰორმონი, შესაბამისად მისი მოშორება, პაციენტებს უმცირებს შიმშილის განცდის ხარისხს, და დანაყრება ხდება ნაკლები საკვების მიღებით. დამატებით, ხდება კუჭის 70-80%-ით შემცირება, რაც ასევე გავლენას ახდენს საკვების მიღების მოცულობებზე. თუმცა, კიდევ ერთი პოზიტიური ფაქტორია ის, რომ მსგავსი პროცედურების დროს, კუჭი კვლავ ნორმალურად აგრძელებს ფუნქციონირებას, არ ექმნება სხვა პრობლემები, შესაბამისად არ ხდება საჭირო მისაღები საკვების კატეგორიზაცია და დამატებითი შეზღუდვების დაწესება.

სამედიცინო კვლევებმა აჩვენა, რომ ჭარბი წონა ზრდის ასთმური პროცესების რთულად წარმართვის რისკს. პაციენტები, რომელთაც ბარიატრიულ ოპერაციამდე აწუხებდა ასთმა, აღნიშნავენ, რომ პროცედურის შემდეგ შესამჩნევად შეუმცირდათ შეტევები და რიგ შემთხვევაში სრულად გაუქრათ. მათ ვინც ოპერაციამდე დამოკიდებული იყო სტეროიდებზე, ბარიატრიული ჩარევიდან 18 თვის ინტერვალში უკვე შეეძლოთ მათ გარეშე ფუნქციონირება.

არსებობს სიმსივნეთა რიგი კატეგორიები, რომელთა განვითარების რისკიც სიმსუქნის დროს მატულობს. ამერიკის სიმსივნის ასოციაციის ინფორმაციით, მათ შორის არის მკერდის, საშვილოსნოს ყელის, საყლაპავის, ნაღვლის ბუშტის, თირკმლის, ღვიძლის კიბო, მრავლობითი მიელომა, არაჰოჯკინის ლიმფომა, საკვერცხის, პანკრეასის, კუჭის და საშვილოსნოს კიბო. პირდაპირი კავშირი სიმსუქნესა და სიმსივნეს შორის არ დგინდება, თუმცა დაკვირვებით ცხადი გახდა, რომ სიმსუქნე იწვევს ჯანმრთელობის მდგომარეობის იმგვარ გართულებას, რაც შემდგომში სიმსივნის კერების წარმოქმნის პროვოცირებას ახდენს. 2008 წელს ამერიკაში ჩატარებული კვლევით დგინდება, რომ სიმსივნით გარდაცვლილთა შორის პაციენტთა 14-20%-ს გამოხატული ჰქონდა სიმსუქნის პრობლემა. აქედან გამომდინარე, რადგან სიმსუქნე ერთ-ერთ რისკ ფაქტორს ამ დაავადებისთვისაც წარმოადგენს, ბარიატრიული ქირურგია დადებით როლს თამაშობს მისი წინასწარი პრევენციის კუთხით.

გულის დაავადებებსა და სიმსუქნეს შორის საკმაოდ მყარი კორელაცია არსებობს. რაც უფრო ჭარბია წონა, მით მეტია გულის დაავადების განვითარების რისკი. მსუქან ადამიანს აქვს მეტი სხეულის მასა, შესაბამისად ორგანიზმში მეტი სისხლის მოძრაობა ხდება და ამ პროცესში გულზე მნიშვნელოვანი დატვირთვა მოდის, რათა მან უზრუნველყოს სისხლის სრულფასოვნად მიწოდება სხეულის სხვადასხვა ორგანოსთვის. ეს დაძაბულობა კიდევ უფრო იმატებს როცა სხეულს ზედმეტი ძალისხმევის გაღება უწევს.

დამატებით, სიმსუქნე ზრდის სხვა კარდიოვასკულარულ რისკ ფაქტორებსაც (როგორიცაა, წნევა და მაღალი ქოლესტერინი), რაც კიდევ უფრო აუარესებს გულის დაავადებათა დინამიკას. ბარიატრიულ ქირურგიას სიმსუქნესთან ბრძოლით შეუძლია აღნიშნული პრობლემების დროული პრევენცია მოახდინოს.

კვლევებით სიმსუქნესა და დეპრესიას შორის პირდაპირი ბმა არ დასტურდება, თუმცა იკვეთება, რომ ეს ორი ერთმანეთის გამომწვევ ფაქტორებად მოიაზრება და ციკლში ხშირ შემთხვევაში ჯაჭვურად არის დაკავშირებული. სტატისტიკურად,სიმსუქნით დაავადებული ადამიანები 25%-ით მეტად არიან მიდრეკილნი  ნეგატიური გუნება-განწყობისკენ. სიმსუქნეს შეუძლია უარყოფითი თვითშეფასების და სოციალური იზოლაციის გამოწვევა, რაც თავის მხრივ აისახება დეპრესიული განწყობების წარმოქმნაში. სიმსუქნით დაავადებულნი ხშირად ხდებიან დისკრიმინაციის ობიექტებიც. გარდა ამისა, ის დაავადებები, რომელთაც სიმსუქნე იწვევს, მაგ. დიაბეტი და ჰიპერტენზია, პირდაპირ იკვეთება დეპრესიასთან.

კვლევებით, მათ, ვინც ბარიატრიის დახმარებით სიმსუქნე დაამარცხა, პოზიტიური დინამიკა აღენიშნა დეპრესიის სიმპტომების შემცირების კუთხითაც. ბარიატრიულ პაციენტებში დეპრესიის დამარცხების მაჩვენებელი 90%-მდე ადის.

გასტროეზოფაგური რეფლუქსი საკმაოდ გავრცელებული დაავადებაა, და ის ჩნდება მაშინ, როცა სარქველი, რომელიც საკვებს და კუჭის მჟავას კუჭში ტოვებს, სრულფასოვნად არ ფუნქციონირებს და იწვევს მის უკან გამოდევნას. საყლაპავი მილი თავის მხრივ არ არის ისე მოწყობილი, რომ შეებრძოლოს მჟავისებურ ნივთიერებებს და შესაბამისად ხშირად აქვს ადგილი მილის დაზიანებას. იმასაც აღნიშნავენ, რომ მილის ქრონიკულმა დაზიანებამ შემდგომში შესაძლოა გამოიწვიოს საყლაპავის კიბო.

სიმპტომებს შორის ხშირია გულძმარვა, გახშირებული ხველა, ტკივილი გულ-მკერდის არეში, უსიამოვნო გემო პირის ღრუში და ა.შ. ზედმეტი წონის კლება მნიშვნელოვნად ამცირებს სტრესს ორგანოებზე, და შესაბამისად გასტროეზოფაგური რეფლუქსის სიმპტომებს, გამოვლინებებს. რიგი ზემო აღნიშნული სიმპტომატიკისა უმცირდება პოსტ ბარიატრიული პაციენტების 90%-ს.

ნორმალური წნევის მაჩვენებლად ითვლება 120/80. პირველი მაჩვენებელი დგინდება გულის აჩქარების რიტმით. როცა ერთერთი ან ორივე მათგანი სცდება ზღვარს, გულისა და სისხლძარღვების მუშაობა მეტად ინტენსიური ხდება და შესაძლოა გამოიწვიოს ისეთი მდგომარეობები, როგორიცაა არტერიების გამკვრივება, ინსულტი, გულის უკმარისობა.

მაღალ არტერიულ წნევასთან შესაძლოა კავშირში იყოს ისეთი ფაქტორები, როგორიცაა სტრესი, თამბაქოს მოწევა, დიეტა, ალკოჰოლის ჭარბი მოხმარება და ასევე, სიმსუქნე.

წნევა განისაზღვრება ცირკულირებადი ჰორმონების კომპლექსური სისტემით, რომელთა ნაწილი იქმნება ცხიმოვან ქსოვილებში. ეს ჰორმონები ადგენენ არტერიების დიამეტრს და შესაბამისად წნევას არტერიებში.

მიზეზები, რატომ იწვევს სიმსუქნე ჰიპერტენზიას, კომპლექსურია, თუმცა, ერთ-ერთი არის გამომუშავებული ინსულინის უფრო მაღალი დონე, რაც საბოლოო ჯამში წევს წნევას.

წონის კლებით იკლებს ჰიპერტენზიის გამომწვევი ჰორმონების გამომუშავებაც. სიმპტომატიკის შემცირება აღინიშნება პოსტ-ბარიატრიულ პაციენტთა 98%-ში.